ਆਰ.ਟੀ.ਆਈ.’ਚ ਹੋਇਆ ਖੁਲਾਸਾ

ਆਰ.ਟੀ.ਆਈ.’ਚ ਹੋਇਆ ਖੁਲਾਸਾ

 

ਪੰਜਾਬ ’ਚ ਚੱਲ ਰਹੇ ਮਾਨਤਾ ਪ੍ਰਾਪਤ ਆਈਲੈਟਸ ਸੈਟਰਾਂ ਦੀ ਗਿਣਤੀ 1900 ਤੋਂ ਵੱਧ ਬਿਨ੍ਹਾਂ ਮਾਨਤਾ ਵਾਲੇ ਇਸ ਤੋਂ ਕਈ ਗੁਣਾਂ ਜਿਆਦਾ
ਪ੍ਰਸਾਸ਼ਨ ਬਿਨ੍ਹਾਂ ਮਾਨਤਾ ਵਾਲੇ ਆਈਲੈਟਸ ਸੈਟਰਾਂ ’ਤੇ ਨਹੀ ਕਰਦਾ ਕਾਰਵਾਈ : ਬੁਜਰਕ
ਮੂਨਕ(,ਨਰੇਸ਼ ਤਨੇਜਾ)-ਪਿਛਲੇ ਇੱਕ ਦਹਾਕੇ ਤੋਂ ਪੰਜਾਬ ਅੰਦਰ ਨੌਜਵਾਨ ਮੁੰਡੇ-ਕੁੜੀਆਂ ਵੱਲੋਂ ਆਈਲੈਟਸ ਕਰਕੇ ਵਿਦੇਸ਼ ਜਾਣ ਦਾ ਰੁਝਾਨ ਇਸ ਕਦਰ ਵਧਿਆ ਹੈ ਕਿ ਰਾਜ ਦੇ ਛੋਟੇ-ਵੱਡੇ ਸ਼ਹਿਰਾਂ,ਕਸਬਿਆਂ,ਪਿੰਡਾਂ ਤੋਂ ਲੈ ਕੇ ਹਰ ਗਲੀ-ਮੁਹੱਲੇ ਦੇ ਮੋੜ੍ਹ ’ਤੇ ਆਈਲੈਟਸ ਸੈਟਰਾਂ ਖੁੱਲੇ ਹੋਣ ਦੇ ਬੋਰਡ ਲੱਗੇ ਵਿਖਾਈ ਦੇ ਰਹੇ ਹਨ। ਜਿਸ ਕਰਕੇ ਇਨ੍ਹਾਂ ਆਈਲੈਟਸ ਸੈਟਰਾਂ ਕਾਰਨ ਜਿੱਥੇ ਨੌਜਵਾਨ ਪੀੜ੍ਹੀ ਪ੍ਰਦੇਸ਼ਾਂ ਨੂੰ ਜਾ ਰਹੀ ਹੈ ਉਥੇ ਹੀ ਕਰੋੜਾਂ ਰੁਪਏ ਲਗਾ ਕੇ ਚੱਲ ਰਹੀਆਂ ਸਿੱਖਿਆ ਸੰਸਥਾਵਾਂ ਨੂੰ ਦੁਕਾਨਾਂ ਨੁਮਾ ਇਨ੍ਹਾਂ ਸੈਟਰਾਂ ਨੇ ਖਤਮ ਹੋਣ ਕਿਨਾਰੇ ਖੜ੍ਹਾ ਕਰ ਦਿੱਤਾ ਹੈ। ਪੰਜਾਬ ਦੇ 22 ਜਿਿਲਆਂ ਦੇ ਡਿਪਟੀ ਕਮਿਸਨਰਾਂ ਕੋਲੋਂ ਮਾਨਤਾ ਲੈ ਕੇ ਖੁੱਲਣ ਵਾਲੇ ਆਈਲੈਟਸ ਸੈਟਰਾਂ ਦੀ ਗਿਣਤੀ 1988 ਦੇ ਕਰੀਬ ਹੈ। ਜਿਹੜੇ ਪ੍ਰਸਾਸਨਿਕ ਤੌਰ ’ਤੇ ਮਾਨਤਾ ਲੈ ਕੇ ਚੱਲ ਰਹੇ ਹਨ। ਇਸ ਗਿਣਤੀ ਤੋਂ ਕਈ ਗੁਣਾਂ ਜਿਆਦਾ ਟਿਊਸ਼ਨ ਅਤੇ ਸਲਾਹਕਾਰ ਸੈਟਰ ਚਲਾਏ ਜਾ ਰਹੇ ਹਨ। ਜਿਨ੍ਹਾਂ ਕੋਲ ਮਾਨਤਾ ਵਜੋਂ ਲਾਈਸੈਸ ਕੋਈ ਹੋਰ ਹੈ ਪਰ ਕਾਰੋਬਾਰ ਆਈਲੈਟਸ ਦੇ ਨਾਮ ’ਤੇ ਕੀਤਾ ਜਾ ਰਿਹਾ ਹੈ।
ਇਸ ਮਾਮਲੇ ਸਬੰਧੀ ਜਾਣਕਾਰੀ ਦਿੰਦਿਆਂ ਆਰ.ਟੀ.ਆਈ ਮਾਹਿਰ ਅਤੇ ਲੋਕ ਜਾਗ੍ਰਤਿ ਮੰਚ ਦੇ ਸੂਬਾ ਪ੍ਰਧਾਨ ਬ੍ਰਿਸ ਭਾਨ ਬੁਜਰਕ ਨੇ ਦੱਸਿਆ ਕਿ ਗ੍ਰਹਿ ਮਾਮਲੇ ਤੇ ਨਿਆਂ ਵਿਭਾਗ ਪੰਜਾਬ ਕੋਲੋਂ ਸੂਚਨਾ ਦੇ ਅਧਿਕਾਰ ਐਕਟ 2005 ਤਹਿਤ ਰਾਜ ਅੰਦਰ ਚੱਲ ਰਹੇ ਮਾਨਤਾ ਪ੍ਰਾਪਤ ਆਈਲੈਟਸ ਸੈਟਰਾਂ ਦੀ ਜਿਲ੍ਹੇ ਦੇ ਹਿਸਾਬ ਨਾਲ ਜਾਣਕਾਰੀ ਮੰਗੀ ਗਈ ਸੀ। ਜਿਸ ਦੇ ਜਵਾਬ ਵਿੱਚ ਵੱਖ-ਵੱਖ ਡਿਪਟੀ ਕਮਿਸਨਰਾਂ ਵੱਲੋਂ ਭੇਜੀ ਗਈ ਸੂਚੀ ਮੁਤਾਬਿਕ ਪੰਜਾਬ ਵਿੱਚ ਮਾਨਤਾ ਪ੍ਰਾਪਤ ਆਈਲੈਟਸ ਸੈਟਰਾਂ ਦੀ ਗਿਣਤੀ 1988 ਦੇ ਕਰੀਬ ਹੈ। ਇਸ ਗਿਣਤੀ ਵਿੱਚੋਂ ਅਜੀਤ ਸਿੰਘ ਨਗਰ ਅਤੇ ਨਾਲ ਲਗਦੇ ਇਲਾਕੇ ਵਿੱਚ ਕੋਈ ਵੀ ਮਾਨਤਾ ਪ੍ਰਾਪਤ ਆਈਲੈਟਸ ਸੈਟਰ ਨਹੀ ਹੈ। ਜਦੋਂ ਕਿ ਲੁਧਿਆਣੇ ਜਿਲ੍ਹੇ ਵਿੱਚ ਸਿਰਫ 53 ਆਈਲੈਟਸ ਸੈਂਟਰ ਚੱਲ ਰਹੇ ਹਨ ਅਤੇ ਬਾਕੀ ਦੀਆਂ ਸਾਖਾਵਾਂ ਨਾਲ ਸਬੰਧਤ ਜਿਨ੍ਹਾਂ ਵਿੱਚ ਟਿਊਸ਼ਨ ਸੈਟਰ,ਸਲਾਹਕਾਰ, ਟਿਕਟ ਅਤੇ ਟਰੈਵਲ ਏਜੰਟ ਆਦਿ ਸਾਮਲ ਹਨ, ਦੇ 1217 ਲਾਈਸੈਸ ਹਨ। ਜਲਲੰਰ ਜਿਲ੍ਹੇ ਵਿੱਚ ਆਈਲੈਟਸ ਅਤੇ ਕੋਚਿੰਗ ਸੈਟਰਾਂ ਦੀ ਗਿਣਤੀ 421 ਹੈ। ਕਿਉਕਿ ਇੱਥੇ ਦੋਨੋਂ ਹੀ ਕੈਟਾਗਰੀਆਂ ਦੇ ਲਾਈਸੈਸ ਹਨ। ਬ੍ਰਿਸ ਭਾਨ ਬੁਜਰਕ ਨੇ ਦੱਸਿਆ ਕਿ ਮੋਗਾ ’ਚ 189,ਨਵਾਂ ਸ਼ਹਿਰ ’ਚ 103,ਪਠਾਨਕੋਟ ’ਚ 16, ਸ੍ਰੀ ਮੁਕਤਸਰ ਸਾਹਿਬ ’ਚ 86,ਪਟਿਆਲਾ ’ਚ 211,ਫਰੀਦਕੋਟ ’ਚ 100,ਬਰਨਾਲਾ ’ਚ 73,ਸੰਗਰੂਰ ’ਚ 107,ਫਿਰੋਜਪੁਰ ’ਚ 58,ਰੂਪਨਗਰ ’ਚ 86,ਮਾਲੇਰਕੋਟਲਾ ’ਚ 10,ਤਰਨਤਾਰਨ ’ਚ 4,ਮਾਨਸਾ ’ਚ 38,ਕਪੂਰਥਲਾ 148,ਹੁਸਿਆਰਪੁਰ ’ਚ 93 ਅਤੇ 239 ਕੋਚਿੰਗ ਸੈਟਰ,ਫਤਹਿਗੜ੍ਹ ਸਾਹਿਬ ’ਚ 9,ਗੁਰਦਾਸਪੁਰ ’ਚ 7 ਅਤੇ 56 ਕੋਚਿੰਗ ਸੈਟਰ,ਬਠਿੰਡਾ ’ਚ 65 ਅਤੇ 194 ਕੋਚਿੰਗ ਸੈਂਟਰ,ਅੰਮ੍ਰਿਤਸਰ ’ਚ 111 ਅਤੇ 342 ਕੋਚਿੰਗ ਸੈਂਟਰ ਚੱਲ ਰਹੇ ਹਨ। ਇਸ ਤੋਂ ਕਈ ਗੁਣਾਂ ਜਿਆਦਾ ਕਿਸੇ ਹੋਰ ਕੈਟਾਗਰੀ ਦੇ ਲਾਈਸੈਸਾਂ ’ਤੇ ਆਈਲੈਟਸ ਸੈਂਟਰ ਚਲਾਏ ਜਾ ਰਹੇ ਹਨ ਜਾਂ ਫਿਰ ਇੱਕ ਜਿਲ੍ਹੇ ਵਿੱਚੋਂ ਲਾਈਸੈਸ ਲੈ ਕੇ ਬਿਨ੍ਹਾਂ ਮਾਨਤਾ ਤੋਂ ਦੂਸਰੇ ਜਿਲ੍ਹੇ ਅੰਦਰ ਆਪਣੀਆਂ ਸਾਖਾਵਾਂ ਖੋਲ੍ਹੀਆਂ ਹੋਈਆਂ ਹਨ। ਉਨ੍ਹਾਂ ਕਿਹਾ ਕਿ ਰਾਜ ਅੰਦਰ ਚੱਲ ਰਹੇ ਆਈਲੈਟਸ ਸੈਟਰਾਂ ’ਤੇ ਸਿੱਖਿਆ ਸੰਸਥਾਵਾਂ ਵਾਂਗ ਕੋਈ ਵੀ ਨਿਯਮ ਲਾਗੂ ਨਹੀ ਹੋ ਰਿਹਾ। ਦੁਕਾਨਾਂ ਅਤੇ ਚੁਬਾਰਿਆਂ ਵਿੱਚ ਹੀ ਅਜਿਹੇ ਸੈਂਟਰ ਚਲਾਏ ਜਾ ਰਹੇ ਹਨ। ਜਿੱਥੇ ਕਿਸੇ ਵੀ ਗੈਰ ਕੁਦਰਤੀ ਆਫਤ ਨਾਲ ਨਜਿੱਠਣ ਲਈ ਕੋਈ ਵੀ ਪ੍ਰਬੰਧ ਨਹੀ ਹੈ ਅਤੇ ਪ੍ਰਸਾਸਨ ਵੱਲੋਂ ਗੈਰ ਮਾਨਤਾ ਪ੍ਰਾਪਤ ਸੈਟਰਾਂ ’ਤੇ ਕੋਈ ਕਾਰਵਾਈ ਨਹੀ ਕੀਤੀ ਗਈ। ਦੂਸਰੇ ਪਾਸੇ ਕਰੋੜਾਂ ਰੁਪਏ ਖਰਚ ਕਰਕੇ ਚਲਾਈਆਂ ਜਾ ਰਹੀਆਂ ਸਿੱਖਿਆ ਸੰਸਥਾਵਾਂ ਦਾ ਭਵਿੱਖ ਵੀ ਹਨੇਰਾ ਨਜ਼ਰ ਆ ਰਿਹਾ ਹੈ ਕਿਉਕਿ ਬਾਰਵੀਂ ਜਮਾਤ ਤੋਂ ਬਾਅਦ ਜਿਆਦਾਤਰ ਨੌਜਵਾਨ ਆਈਲੈਟਸ ਕਰਕੇ ਵਿਦੇਸ਼ ਉਡਾਰੀ ਮਾਰਨ ਦੀ ਯੋਜਨਾ ਤਿਆਰ ਕਰਦੇ ਹਨ। ਜਿਸ ਕਰਕੇ ਪੰਜਾਬ ਸਰਕਾਰ ਨੂੰ ਇਸ ਗੰਭੀਰ ਮਾਮਲੇ ਵੱਲ ਉਚੇਚੇ ਤੌਰ ’ਤੇ ਧਿਆਨ ਦੇਣਾ ਚਾਹੀਦਾ ਹੈ।
ਕੈਪਸ਼ਨ : ਜਾਣਕਾਰੀ ਦਿੰਦੇ ਹੋਏ ਬ੍ਰਿਸ ਭਾਨ ਬੁਜਰਕ

 

,